Республикӑри йӗрке хуралҫисем «Хӗл мучи полицейски» акцие хутшӑнаҫҫӗ. Нумаях пулмасть вӗсем светофор симӗс ҫутнӑ вӑхӑтра ҫул урлӑ каҫнӑ чухне автобус айне ҫакланнӑ арҫын ача патне саламлама кайнӑ. Телее, вӑл аварире хытах аманман.
Полицейскисем ӑна шкултан кӗтсе илнӗ, пылак парнепе савӑнтарнӑ, вылямалли полици машини тата паттӑрсем пирки ҫырнӑ кӗнеке панӑ.
Ку канмалли кунсенче, раштав уйӑхӗн 21-мӗшӗнче 13 сехетре «Амазония» этнокомплексра Хӗл мучин ҫуртне савӑнӑҫлӑ лару-тӑрура уҫӗҫ.
Ҫӗнӗ ҫул чӑрӑшӗ патне уяв асамҫин тронне вырнаҫтарӗҫ. Унта кашни ача ларса курма, сӑвӑ каласа, юрласа кӑтартма пултарать. Ҫавӑнтах хитре сӑн ӳкерӗнме май пулӗ.
Чи лайӑх хыпарӗ вара акӑ мӗн: Хӗл мучин ҫуртне тӳлевсӗрех кӗртеҫҫӗ.
Шупашкар муниципаллӑ округӗнчи Шӑнкас ялӗнче пурӑнакан Ивановсен ҫемйи кашни ҫулах Ҫӗнӗ ҫул тӗлне кил умне капӑрлатать. Кӑҫал вӗсем Чӑваш тӗррин кунӗ тӗлне хапхи ҫине чӑваш эрешне ӳкернӗччӗ.
Хальхи вӑхӑтра Ивановсен килӗ умӗнче чӑн-чӑн асамлӑх хуҫаланать. Вӗсем Ҫӗлен ҫулталӑкне кӗтсе илме хатӗрленнӗ ӗнтӗ.
Ҫӗнӗ ҫул ҫывхарать. Ялсенче, хуласенче урамсем капӑрлансах пыраҫҫӗ. Хӑш-пӗр вырӑнта юмаха лекнӗнех туйӑнать.
Ҫавӑн пек вырӑнсенчен пӗри – Хӗрлӗ Чутайри Ҫамрӑксен урамӗ. Унта пурӑнакансем кил-ҫуртне илемлетнӗ: йӑлтӑр-ялтӑр гирляндӑсем, хитрелетнӗ чӳречесем чӑннипех те Ҫӗнӗ ҫул асамлӑхӗ парнелеҫҫӗ.
Эсир те кил-ҫурта капӑлатнӑ-и?
Чӑваш Енри ӳнерҫӗ Ксения Кошелева Ҫӗнӗ ҫулпа ҫыхӑннӑ открыткӑсен серине хатӗрленӗ. Унта вӑл чӑваш колоритне кӗртнӗ.
Ксения каланӑ тӑрӑх, вӑл хӑйӗн ачалӑхӗнчи открыткӑсене тӗпе хунӑ. Вӗсем чӑннипех те Совет Союзӗнчи открыткӑсене аса илтереҫҫӗ.
Палӑртмалла: Ксения Кошелева чӑвашлӑхпа ҫыхӑннӑ открыткӑсем хатӗрлет. Хальхи вӑхӑтра ҫамрӑк ӳнерҫӗ Мускавра пурӑнать. Хӑй Йӗпреҫ округӗнчи Ҫӑкалӑх ялӗнче ҫуралса ӳснӗ.
Ҫӗнӗ ҫул ҫывхарать. Ҫитес эрнере Шупашкарта чӑрӑш пасарӗсем ӗҫлеме тытӑнӗҫ. Уяв «чиперккине» хулари 15 вырӑнта туянма пулать.
Пасар раштав уйӑхӗн 15-мӗшӗнче уҫӑлӗ. Вӗсем раштавӑн 31-мӗшӗччен ӗҫлӗҫ. Сӑмахран, чӑрӑша «Шупашкар» суту-илӳ ҫуртӗнче, Трактор тӑвакансен проспектӗнчи 45-мӗш, 71-мӗш ҫуртсен ҫывӑхӗнче, Гагарин урамӗнчи 29-мӗш ҫурт патӗнче туянма пулать. Пасарсем Ильбеков, Хусанкай, К.Маркс, Павлов мичман, Энтузиастсен урамӗнче те ӗҫлӗҫ.
Кӑҫал республикӑра Ҫӗнӗ ҫула пысӑк та хаваслӑ мероприятисемсӗр, фейерверксӑр кӗтсе илӗҫ. Ҫапла пӗлтернӗ ЧР Элтеперӗ Олег Николаев.
Мероприятисем ытларах ачасем валли пулӗҫ. Вӗсемшӗн Ҫӗнӗ ҫул асамлӑ уяв пулмалла. Элтеперӗн елкине Запорожье облаҫӗнчи ачасене илсе килесшӗн. Шӑпӑрлансене парнесемпе савӑнтарӗҫ.
Ҫӗнӗ ҫул хыҫҫанхи каникулти кунсем сивӗ килчӗҫ. Шел те, шӑнса вилекенсем те пулнӑ.
Чӑваш Ен Элтеперӗн администрацийӗ паян хыпарланӑ тӑрӑх, республикӑра ҫулталӑк пуҫланнӑранпа 7 ҫын шӑнса вилнӗ. Тепӗр 28 ҫын ӳтне тӑм илтернӗ.
Сӑмах май, пӗлтӗр Ҫӗнӗ ҫулти каникулта 5 ҫын шӑнса вилнӗ, 14 ҫын ӳтне тӑм илтерсе пульницӑна лекнӗ.
Кӑҫал Чӑваш Енре пӗрремӗш ача Ҫӗнӗ ҫул хыҫҫӑн, ҫур ҫӗр иртни 2 сехет те 40 минутра ҫуралнӑ. Вӑл - хӗрача, Хулари 1-мӗш клиника пульницин пепкелӗх центрӗнче кун ҫути курнӑ.
Хӗрача 3720 грамм тайнӑ, 52 сантиметр ҫӳллӗш пулнӑ.
Хӗрачан ашшӗ-амӑшне саламлатпӑр!
К.В. Иванов ячӗллӗ Чӑваш академи жрама театрӗ хӑйӗн куракансем валли «Хӗл Мучи патне хӑнана» музыкӑпа ташӑ программи хатӗрленӗ.
Ӑна культура учрежденийӗнче раштав уйӑхӗн 29 тата 30-мӗшӗсенче кӑтартнӑ. Унта ҫитсе курайманнисен пӑшӑрханма кирлӗ мар. Программӑпа тепре кӑрлач уйӑхӗн 6-мӗшӗнче паллашма май килӗ.
Курма пыракансем 19-мӗш ӗмӗрти чӑваш ялӗнче пулса курайӗҫ, спектакльсенчи вӑйӑ-ташӑ саманчӗсемпе киленейӗҫ.
Театр артисчӗсем Надежда Кузьмина, Александр Демидов, Григорий Федоров, Арсентий Димитриев, Чӑваш Республикин тава тивӗҫлӗ артисчӗ Валерий Карпов, Чӑваш Республикин тава тивӗҫлӗ артисчӗ Сергей Павлов, Евгений Урдюков, Василий Иванов, Кристина Иванова, Надежда Зубкова, Анна Кудряшова, Чӑваш Республикин тава тивӗҫлӗ артисчӗ Александр Яковлев, Чӑваш патшалӑх оперӑпа балет театрӗн солисчӗ Василий Николаев илемлӗ юрӑсем парнелӗҫ.
-1.7 °C